Salah ekki með í byrjun næsta tímabils?

Egypski framherjinn Mohamed Salah gæti misst af upphafi næsta keppnistímabils með Liverpool þar sem Egyptar hyggjast tefla honum fram á Ólympíuleikunum í Tókýó í sumar.

Leikarnir hefjast 22. júlí og knattspyrnukeppninni lýkur laugardaginn 8. ágúst, sama dag og keppnistímabilið í ensku úrvalsdeildinni hefst. Salah myndi í það minnsta missa alveg af undirbúningstímabilinu og mögulega fyrstu leikjum í deildinni.

Á Ólympíuleikunum leika U23 ára lið en mega tefla fram þremur eldri leikmönnum. Shawky Gharib, þjálfari liðsins, sagði í viðtali við ON Sport TV í Egyptalandi að hann hafði í hyggju að velja Salah sem einn þessara þriggja.

Hann staðfesti í viðtalinu að hann ætti fyrir höndum viðræður við Salah um málið en leikmaðurinn myndi þó eiga lokaorðið og taka endanlega ákvörðun sjálfur um hvort hann gefi kost á  sér í verkefnið.

Útlit er fyrir að Salah verði, ásamt fleiri afrískum leikmönnum Liverpool, fjarverandi fyrstu fimm til sex vikur ársins 2021 því Afríkumótið fer fram í Kamerún dagana 9. janúar til 6. febrúar.

• Blogga um frétt