José Mourinho, knattspyrnustjóri Tottenham, telur að suðurkóreski sóknarmaðurinn Heung-Min Son verði mun lengur frá keppni en félagið hefur gefið út.
Tottenham tilkynnti fyrr í dag að Son yrði frá næstu vikurnar vegna handleggsbrots sem hann varð fyrir í leiknum við Aston Villa á sunnudaginn. Mourinho sagði á fréttamannafundi í dag að hann óttaðist að Son myndi ekki spila meira á þessu tímabili.
„Yfirlýsingin frá félaginu var fallega orðuð. Ef ég hefði skrifað þessa yfirlýsingu hefði hún verið allt öðruvísi. Við söknum hans,“ sagði Mourinho.