Enska knattspyrnusambandið hefur staðfest við BBC að atvik sem átti sér stað eftir leik Tottenham og Norwich í ensku bikarkeppninni í gærkvöldi er til rannsóknar. Um er að ræða þegar Eric Dier, leikmaður Tottenham, hljóp upp í stúku og átti í deilum við stuðningsmann.
Myndskeið sem birtust á samfélagsmiðlum sýndu Dier hlaupa meðfram hliðarlínunni eftir leikinn, stökkva yfir auglýsingaskilti og hlaupa yfir sæti í stúkunni þar sem hann virtist stefna á einn tiltekinn áhorfanda, án þess þó að ná til hans þar sem aðrir áhorfendur komu í veg fyrir það. Er áhorfandinn sagður hafa beint niðrandi ummælum til yngri bróður Dier.
José Mourinho, stjóri Tottenham, fordæmdi viðbrögð leikmanns síns en sagðist þó skilja hann engu að síður. „Dier gerði það sem við atvinnumenn megum ekki gera,“ sagði Portúgalinn við Sky Sports eftir leikinn. Enska knattspyrnusambandið mun nú rannsaka málið.