Skoski knattspyrnustjórinn David Moyes er kominn í sóttkví þrátt fyrir að finna ekki fyrir einkennum kórónuveirunnar.
Ástæðan er sú að Moyes átti í beinum samskiptum við Mikel Arteta, stjóra Arsenal, sem fékk veiruna í vikunni. Arsenal og West Ham mættust í ensku úrvalsdeildinni fyrr í mánuðinum.
Leikmenn West Ham voru settir í sóttkví í gær af sömu ástæðu. Allur leikmannahópur Arsenal er í sóttkví eftir smit Arteta, sem segist sjálfur vera á batavegi.
Í gær var ensku úrvalsdeildinni frestað til að minnsta kosti 4. apríl vegna veirunnar og þá var einnig efstu deild kvenna og neðri deildum karla frestað.