Karren Brady, varaformaður stjórnar enska knattspyrnufélagsins West Ham, ætlar að taka á sig sömu 30% launalækkun og leikmenn ensku úrvalsdeildarinnar vegna kórónuveirufaraldursins sem nú herjar á heimsbyggðina.
Forráðamenn deildarinnar og samtök leikmanna munu funda í dag um fyrirhugaða launalækkun sem mun meðal annars gefa deildinni svigrúm til að styrkja neðri deildirnar og heilbrigðiskerfið í Bretlandi.
Brady, sem á dögunum kallaði eftir því að núverandi tímabil yrði dæmt dautt og ómerkt, segir að allir innan knattspyrnuheimsins þurfi að standa saman. Hún telur launalækkunina sanngjarna og nauðsynlega og þá sé ekki síður sanngjarnt að hún, og aðrir í hennar stöðu, geri slíkt hið sama.