Jordan Pickford, markvörður enska knattspyrnufélagsins Everton, á ekki sjö dagana sæla þessa dagana en hann hefur verið mikið í umræðunni eftir leik Everton og Liverpool í ensku úrvalsdeildinni hinn 17. október síðastliðinn.
Pickford tæklaði Virgil van Dijk, varnarmann Liverpool, mjög illa í leiknum með þeim afleiðingum að miðvörðurinn skaddaði liðbönd á hné.
Pickford var ekki refsað fyrir tæklinguna en Van Dijk mun að öllum líkindum ekki spila meira á tímabilinu og þá er óvíst með þátttöku hans með hollenska landsliðinu á lokakeppni EM sem fram fer víðsvegar um Evrópu næsta sumar.
Pickford hefur fengið mikið af líflátshótunum eftir atvikið og þá hefur fjölskyldu hans einnig verið hótað á samfélagsmiðlum.
„Jordan er í hálfgerðu sjokki yfir öllum svívirðingunum sem hann hefur mátt þola undanfarna daga,“ sagði aðili tengdur markmanninum í samtali við Sportsmail.
„Hann hefur ráðið lífverði sem fylgja bæði honum og fjölskyldu hans hvert fótmál. Þá sér öryggisfyrirtæki um að vakta húsið hans á kvöldin og næturna,“ segir ennfremur í umfjöllun Sportsmail um málið.