Wayne Rooney leikur ekki með Derby þegar liðið fær Wycombe Wanderers í heimsókn í ensku B-deildinni í knattspyrnu á morgun en þetta staðfesti félagið í dag.
Rooney hefur séð um að stýra liðinu í undanförnum leikjum eftir að Hollendingurinn Philip Cocu var látinn taka pokann sinn.
Sóknarmaðurinn hefur hins vegar tekið þátt í leikjum liðsins líka og Liam Rosenoir hefur stýrt því af bekknum en í dag var ákveðið að Rooney myndi einbeita sér að því að stýra liðinu á hliðarlínunni.
Óvíst er hver tekur við liðinu en Derby er í neðsta sæti ensku B-deildarinnar með 6 stig eftir fyrstu þrettán leiki tímabilsins, 4 stigum frá öruggu sæti.
Rooney hefur hefur verið orðaður við stjórastöðuna hjá félaginu en Derby ætlar sér að ráða nýjan knattspyrnustjóra á næstu dögum.