Úrvalsdeildarleikmaður þarf að fá nýra

Kevin McDonald skorar fyrir Burnley í leik gegn Arsenal.
Kevin McDonald skorar fyrir Burnley í leik gegn Arsenal. Reuters

Kevin McDonald, leikmaður enska knattspyrnuliðsins Fulham, er á leið í stóra aðgerð í aprílmánuði þar sem hann fær nýtt nýra.

McDonald, sem er 32 ára gamall skoskur miðjumaður og hefur spilað 128 leiki með Fulham frá árinu 2016, hefur ekkert náð að leika með liðinu í vetur vegna veikindanna en hann hefur verið með krónískan nýrnasjúkdóm í tólf ár og ástandið hefur versnað undanfarna mánuði.

„Fótboltinn hefur verið frábær en nú er þetta aðalmálið. Ég vil komast í gegnum þetta og snúa svo aftur til eðlilegra lífs. Ég ætti að geta spilað til 35 ára aldurs en úrvalsdeildin gæti reynst of hröð fyrir mig. Ég veit ekki fyrr en eftir aðgerðina hvort ég verð tilbúinn í fótboltann á ný, eða hvort ég einbeiti mér að þjálfun,“ sagði McDonald á heimasíðu Fulham en hann hefur í vetur aðstoðað við þjálfun U18 og U23 ára liða félagsins.

McDonald lék áður með Wolves, Sheffield United og Burnley og skoska liðinu Dundee og á að baki um 450 deildaleiki á ferlinum. Þá hefur hann leikið fimm A-landsleiki fyrir Skotland.

mbl.is