Dean Henderson, varamarkvörður enska landsliðsins og leikmaður Manchester United, hefur dregið sig úr enska landsliðshópnum vegna meiðsla og tekur því engan þátt á Evrópumótinu í fótbolta sem nú stendur yfir.
Henderson, sem er meiddur á mjöðm, var á varamannabekk Englands þegar liðið vann góðan 1:0-sigur í D-riðli mótsins gegn Króatíu á sunnudaginn.
Jordan Pickford hjá Everton er aðalmarkvörður liðsins og einnig er Sam Johnstone, markvörður West Bromwich Albion, í hópnum.
Gareth Southgate, þjálfari Englendinga, hefur þegar kallað inn nýjan markvörð í stað Hendersons. Það er Aaron Ramsdale, markvörður Sheffield United.
England mætir Skotlandi næstkomandi föstudag í öðrum leik liðanna í D-riðlinum.