Roberto Firmino, sóknarmaður enska knattspyrnufélagsins Liverpool, nálgast endurkomu á knattspyrnuvöllinn. Þetta tilkynnti Jürgen Klopp, stjóri Liverpool, á blaðamannafundi með fjölmiðlamönnum í dag.
Firmino fór meiddur af velli í 2:0-sigri Liverpool gegn Atlético Madrid í B-riðli Meistaradeildarinnar hinn 3. nóvember og hefur ekki leikið með liðinu síðan en hann tognaði aftan í læri gegn Atlético.
Liverpool heimsækir Everton í ensku úrvalsdeildinni á Goodison Park í Liverpool á morgun en Firmino verður fjarverandi í leiknum og vonast Klopp til þess að hann geti hafið æfingar af fullum krafti í næstu viku.
Þá greindi Klopp einnig frá því að þeir Naby Keita, Joe Gomez og Curtis Jones séu allir nálægt því að snúa aftur í liðið en þeir hafa verið að glíma við meiðsli undanfarnar vikur.