Mikel Arteta, knattspyrnustjóri Arsenal, þurfti að halda aftur af Granit Xhaka, miðjumanni liðsins, eftir sigurinn gegn Tottenham í ensku úrvalsdeildinni á Tottenham Hotspur-vellinum í Lundúnum á sunnudaginn.
Arsenal fagnaði sigri í leiknum, 2:0, en það sauð allt upp úr í Lundúnum í leikslok eftir að stuðningsmaður Tottenham sparkaði í Aaron Ramsdale, markvörð Arsenal.
Leikmenn liðanna tókust svo á á vellinum eftir að dómari leiksins Craig Pawson hafði flautað til leiksloka.
Xhaka ætlaði að blanda sér í málin áður en Arteta hljóp að Svisslendingnum og dró hann inn í klefa.
Myndband af atvikinu má sjá í spilaranum hér fyrir ofan.