Gylfi á lista yfir dýrustu leikmenn sögunnar

Gylfi Þór Sigurðsson er enn einn af 100 dýrustu knattspyrnumönnum allra tíma, en Everton greiddi Swansea 42 milljónir evra fyrir leikmanninn árið 2017.

Vefmiðilinn Goal birti í dag lista yfir 100 dýrustu leikmenn allra tíma og er Gylfi í 100. sæti listans. Íslendingurinn hefur ekki leikið knattspyrnu síðan hann var handtekinn í júlí fyrir tveimur árum, í máli sem að lokum var látið niður falla í apríl á þessu ári.

Gylfi lék 136 leiki með Everton í ensku úrvalsdeildinni og skoraði í þeim 25 mörk. Miðjumaðurinn er orðinn 33 ára og er enn óljóst hvort hann reimi á sig takkaskóna á nýjan leik, eða hvort ferlinum sé lokið.

Neymar er dýrasti leikmaður sögunnar, en París SG greiddi Barcelona 222 milljónir evra fyrir Brasilíumanninn árið 2017. Kylian Mbappé er í öðru sæti en Parísarfélagið greiddi 180 milljónir evra fyrir franska landsliðsmanninn.

Portúgalinn João Félix er í þriðja sæti. Spænska félagið Atlético Madríd borgaði Benfica 126 milljónir evra fyrir leikmanninn árið 2019. Hann lék með Chelsea seinni hluta þessa tímabils að láni.

• Blogga um frétt