Hamilton vann harðan slag

Lewis Hamilton á Mercedes vann í þessu ráspól breska kappakstursins eftir hnífjafna og harða keppni við Sebastian Vettel og Kimi Räikkönen á Ferrari.

Munurinn á Hamilton og Vettel var aðeins 44 þúsundustu úr sekúndum en sú tala er sú sama og er að finna á trjónu Mercedesbílsins. Er þetta fjórða árið í röð sem Hamilton hreppir ráspól heimakappaksturs síns.

Vettel var hlutskarpari í fyrri tímatilrauninni í lokalotu tímatökunnar í Silverstone, en þar fer breski kappaksturinn fram á morgun. Var hann þá 57 þúsundustu fljótari með hringinn. Hamilton sneri svo dæminu við í seinni tilrauninni.

Í sætum fjögur til tíu urðu - í þessari röð - Valtteri Bottas á Mercedes, Max Verstappen og Daniel Ricciardo á Red Bull, Kevin Magnussen og Romain Grosjean á Haas, Charles Leclerc á Sauber og Esteban Ocon á Force India, en þótt Mercedesvél knúi bíl hans var Ocon 2,3 sekúnudm lengur með hringinn en Hamilton.

mbl.is