Ríkjandi heimsmeistarinn Max Verstappen, liðsmaður Red Bull, vann franska Formúlu 1 kappaksturinn á Circuit Paul Ricard-brautinni í dag.
Charles Leclerc, sem vann austurríska kappaksturinn fyrir tveimur vikum síðan og byrjaði á ráspól í dag, datt snemma úr leik eftir að hafa keyrt á vegg á 18. hring.
Dagurinn var góður fyrir keppnislið Mercedes þar sem Lewis Hamilton kom annar í mark í sínum þrjúhundraðasta Formúlu 1 kappakstri á ferlinum og George Russell, liðsfélagi hans hjá Mercedes endaði í þriðja sæti.
Sergio Pérez, liðsmaður Red Bull, kom fjórði í mark. Carlos Sainz, liðsmaður Ferrari var fimmti í mark og Fernando Alonso, liðsmaður Alpine var sjötti.
Max Verstappen er nú með 63 stiga forskot á Leclerc í efsta sæti í keppni ökuþóra með 233 stig. Leclerc er með 170 stig og þar á eftir kemur Pérez með 163 stig.