Freyr Alexandersson mun taka við stjórnartaumunum hjá danska B-deildarliðinu Lyngby í vikunni og skrifa undir tveggja ára samning.
Þetta fullyrðir danska dagblaðið B.T. og kveðst hafa heimildir fyrir því að tilkynnt verði formlega um ráðninguna í vikunni.
Freyr var síðast aðstoðarþjálfari Heimis Hallgrímssonar hjá Al-Arabi í Katar og var þar á undan aðstoðarþjálfari Eriks Hamréns hjá íslenska karlalandsliðinu í knattspyrnu.
B.T. greinir frá því að Freyr hafi með sýn sinni á fótbolta og metnað náð að sannfæra stjórnendur Lyngby um að hann sé rétti maðurinn til að koma liðinu aftur upp í dönsku úrvalsdeildina, þaðan sem liðið féll á liðnu tímabili.
Þá hafi persónutöfrar Freys og vilji til þess að þróa hæfileika leikmanna sömuleiðis orðið til þess að hann hafi skotið öðrum, þekktari nöfnum á blaði, ref fyrir rass.