Norska liðið Viking fór í kvöld örugglega áfram í Sambandsdeild Evrópu í fótbolta er það mætti Sligo Rovers frá Írlandi í seinni leik liðanna í 3. umferðinni. Leikið var á Írlandi og fagnaði heimaliðið 1:0 sigri.
Viking vann heimaleikinn 5:1 og fór því áfram með 5:2-samanlögðum sigri. Patrik Sigurður Gunnarsson var allan tímann í markinu hjá Viking og Samúel Kári Friðjónsson lék einnig allan leikinn. Patrik varði víti á 75. mínútu.
Samúel átti glæsilegan fyrri leik í einvíginu, er hann skoraði eitt mark og lagði upp tvö.
Norsku Víkingarnir eru þar með komnir í umspilið um sæti í riðlakeppni Sambandsdeildarinnar og mæta þar FCSB frá Rúmeníu tvo næstu fimmtudaga.