Dan Biton kom Maccabi Tel Aviv yfir gegn Breiðabliki á 35. mínútu en liðin eigast nú við í B-riðli Sambandsdeildar karla í knattspyrnu á Kópavogsvelli.
Biton átti skot utan teigs sem Anton Ari Einarsson í marki Breiðabliks réð ekki við en sólin á Kópavogsvelli virtist blinda markvörðinn.
Biton fagnaði markinu með því að hlaupa að varamannabekk Maccabi Tel Aviv þar sem beið hans stór ísraelskur fáni.
Hann lyfti fánanum svo í átt að stúkunni og fékk að líta gula spjaldið fyrir gjörninginn sem fór ekkert sérstaklega vel í stuðningsmenn Breiðabliks á Kópavogsvelli.
Leikmenn Maccabi Tel Aviv voru mjög ósáttir með dóminn og hópuðust að dómara leiksins, Luka Bilbija frá Bosníu, en upp úr sauð svo á milli liðanna áður en leikurinn hófst á nýjan leik.