Aníta Hinriksdóttir hafnaði í fimmta sæti í 800 metra hlaupi á heimsmeistaramótinu innanhúss í frjálsum íþróttum sem fram fer í Portland í Oregon-ríki.
Hún hljóp á tímanum 2.02,58 en Íslandsmet hennar innanhús er 2.01,56 og besti tími hennar á keppnistímabilinu er 2.01,59. Í undanrásunum í gær hljóp hún á 2.01,96.
Francine Niyonsaba, frá Búrúndí, er heimsmeistari en hún hljóp á tímanum 2.00,01 en það er besti tími ársins í greininni. Ajee Wilson frá Bandaríkjunum hafnaði í öðru sæti á tímanum 2.00,27 og Margaret Wambui frá Kenía varð þriðja á tímanum 2.00,44.
Aníta hljóp í fyrsta undanriðli af þremur í gær en alls voru 17 keppendur skráðir til leiks í 800 metra hlaupi. Hún var með þriðja besta tímann í sínum riðli og þriðja besta tíma allra keppenda í gær og flaug því inn í úrslitin.