Úrslitaleikir kvenna og karla á Íslandsmótinu í holukeppni, sem er haldið á Þorláksvelli í Þorlákshöfn, fara fram eftir hádegi í dag.
Guðrún Brá Björgvinsdóttir úr GK og Eva Karen Björnsdóttir úr GR munu þá leika til úrslita í kvennaflokki.
Guðrún Brá sigraði Huldu Clöru Gestsdóttur úr GKG í undanúrslitum og Eva Karen hafði betur gegn Helgu Signýju Pálsdóttur úr GR.
Lárus Ingi Antonsson úr GA og Sverrir Haraldsson úr GM leika svo til úrslita í karlaflokki.
Lárus Ingi hafði betur gegn Andra Má Óskarssyni úr GOS í undanúrslitum og Sverrir sigraði Andra Þór Björnsson úr GR.
Nánari upplýsingar um úrslitaviðureignirnar og mótið hingað til má finna á heimasíðu Golfsambands Íslands.