Þrettándu umferðinni í úrvalsdeild karla í handknattleik, Olísdeildinni, lýkur í kvöld þegar Valsmenn taka á móti FH-ingum á Hlíðarenda.
Talsvert er í húfi því sigurliðið í kvöld kemst upp fyrir Selfyssinga og í þriðja sæti deildarinnar. FH-ingar eru með 16 stig í fjórða sætinu en Valsmenn eru með 15 stig í sjötta sætinu.
Þegar liðin mættust í annarri umferð deildarinnar í haust hafði FH betur í Kaplakrika, 26:23, þar sem Ásbjörn Friðriksson skoraði 8 mörk fyrir FH og Anton Rúnarsson 7 mörk fyrir Val.
Eftir leik kvöldsins verður ein umferð eftir fyrir landsleikjafríið en hún er spiluð um næstu helgi. Þá eiga Valsmenn útileik gegn Selfyssingum og FH-ingar fá Eyjamenn í heimsókn.