„Ég er pínu leið en þetta var frábær leikur hjá strákunum. Þó að hann hafi endað svona þá var leikurinn mjög skemmtilegur á að horfa – þetta var góður handbolti,“ segir Þorgerður Katrín Gunnarsdóttir, stjórnmálamaður og fyrrverandi handknattleikskona, í samtali við mbl.is. „Strákarnir stóðu sig mjög vel og Aron [Pálmarsson] er náttúrulega í klassa fyrir ofan heimsklassa,“ bætir hún við.
Þorgerður var nýkomin upp á hótel eftir fjörugan dag í München þegar mbl.is náði tali af henni. Hún segist hafa farið á stórmót í handknattleik í næstum 40 ár en sjaldan upplifað eins mikla stemningu og fyrr í kvöld.
„Allir voru ótrúlega hressir, stemningin fyrir leik var mjög góð og hún jókst hægt og sígandi,“ segir Þorgerður sem telur að milli 800 og 1000 Íslendingar hafi verið í München. Króatar voru einnig fjölmennir segir hún.
„Það voru mjög margir Króatar á leiknum, þetta er mikil boltaþjóð hvort sem það er í handbolta, fótbolta, körfubolta eða sundknattleik. Þeir fylgja sínu liði mjög vel og eru mjög háværir,“ segir hún en bætir við að enginn rígur hafi verið milli stuðningsmanna Íslands og Króatíu.
„Stuðningsmenn skiptust á treyjum eftir leik og þetta var allt mjög fallegt. Gleði fyrir leik á báða bóga og hógværð eftir á – ekkert rugl í gangi.“
Þorgerður er bjartsýn fyrir næsta leik Íslendinga á móti Spáni á sunnudag. „Við vinnum hann með tveimur mörkum,“ segir hún að lokum.