Knattspyrnumaðurinn Gylfi Þór Sigurðsson er á meðal áhorfenda á fyrsta leik Vals og Tindastóls í úrslitaeinvígi Íslandsmóts karla í körfuknattleik sem hófst fyrir skömmu á Hlíðarenda.
Þetta er í fyrsta sinn sem Gylfi Þór sést opinberlega á Íslandi eftir að hann snéri aftur til landsins hinn 20. apríl.
14. apríl tilkynntu lögregluyfirvöld í Manchester að Gylfi Þór yrði ekki ákærður fyrir brot gegn ólögráða einstaklingi og væri því laus allra mála.
Gylfi Þór var samningsbundinn enska úrvalsdeildarfélaginu Everton þegar hann var handtekinn í júlí árið 2021.
Samningur hans við enska úrvalsdeildarfélagið rann út síðasta sumar og Gylfi hefur því verið án félags síðan en hann var settur til hliðar hjá félaginu þegar að hann var handtekinn.
Gylfi Þór lék 318 leiki í ensku úrvalsdeildinni þar sem hann skoraði 67 mörk og þá á hann að baki 78 A-landsleiki fyrir Ísland þar sem hann hefur skorað 25 mörk.