Orri Hauksson, forstjóri Símans, var með 40,2 milljónir króna í laun á síðasta ári, eða sem jafngildir 3,35 milljónum króna á mánuði. Stefán Sigurðsson, forstjóri Fjarskipta, móðurfélags Vodafone, var hins vegar með hærri laun, 50 milljónir króna á árinu, sem jafngildir 4,1 milljón króna á mánuði.
Þetta kemur fram í nýbirtum ársreikningum fyrirtækjanna.
Þar kemur jafnframt fram að Orri eigi alls 45,7 milljónir hluta í Símanum og nemur heildarandvirði hlutarins miðað við markaðsgengið í dag 158,5 milljónum króna. Markaðsgengið í dag er 3,47 krónur á hlut en hlutina keypti hann á 2,5 krónur á hlut fyrir almenna útboðið. Ef hann myndi selja hlutina í dag nemur hagnaðurinn því 44,5 milljónum króna.
Stefán Sigurðsson á hins vegar 155 þúsund hluti í Fjarskiptum og miðað við markaðsgengi dagsins nemur andvirði hlutarins um 6,8 milljónum króna.
Í ársreikningi Símans kemur jafnframt fram að aðrir framkvæmdastjórar innan fyrirtækisins, fjórir talsins, fengu samtals greiddar 105 milljónir króna í laun og aðrar launatengdar greiðslur á árinu. Þeir áttu 19 milljónir hluta í félaginu í árslok 2015.
Fjórir framkvæmdastjórar hjá Vodafone voru samtals með 92,2 milljónir króna í árslaun.
Þrátt fyrir að forstjóri Fjarskipta sé með hærri laun en forstjóri Símans er stjórnarformaður síðarnefnda fyrirtækisins tekjuhærri. Sigríður Hrólfsdóttir, stjórnarformaður Símans, var með 10,8 milljónir króna í laun á síðasta ári, eða sem jafngildir 900 þúsund krónum á mánuði.
Heiðar Guðjónsson, stjórnarformaður Fjarskipta, var hins vegar með 6,4 milljóna króna árslaun, eða sem jafngildir um 533 þúsund krónum á mánuði.