Viðskipti | AFP | 28.4.2020 | 7:12 | Uppfært 7:29

SAS segir upp 5 þúsund manns

AFP

Skandinavíska flugfélagið SAS tilkynnti í morgun um að fimm þúsund starfsmönnum félagsins yrði sagt upp. Kórónuveiran hefði þurrkað út alla spurn eftir flugferðum og það myndi taka einhver ár að koma flugrekstri í fyrra horf.

Um er að ræða 50% af öllum starfsmönnum SAS að sögn forstjóra félagsins, Rickard Gustafson.

Miðað við núverandi aðstæður og takmarkanir á ferðaheimildum á SAS ekki von á öðru en að starfsemi félagsins verði afar takmörkuð í sumar segir í fréttatilkynningu frá SAS. Spurn eftir flugferðum verði ekki svipuð því sem hún var fyrir COVID-19 fyrr en eftir einhver ár.

AFP

Gustafson segir í samtali við sænsku fréttastofuna TT að hann teldi að spurn eftir flugferðum myndi verða svipuð og áður en það verði ekki fyrr en árið 2022.

Frétt af mbl.is

10.000 starfsmenn SAS sendir heim

SAS sendi um 90% af starfsfólki félagsins í tímabundið leyfi um miðjan mars og samkvæmt upplýsingum frá félaginu í dag verður um 1.900 starfsmönnum í Svíþjóð sagt upp störfum, 1.300 í Noregi og 1.700 í Danmörku. Um starfsfólk í fullu starfi er að ræða.

Sænska og danska ríkið, sem eru stærstu hluthafar SAS, tilkynntu 17. mars að þau myndu leggja félaginu til rúmlega 275 milljónir evra í ríkisábyrgð til að verja það fyrir efnahagslegum áhrifum kórónukreppunnar. Í dag einskorðast flugáætlun SAS nánast við Noreg og Svíþjóð.