Jón Helgi Guðmundsson, forstjóri og stjórnarformaður Norvik, segir hluthöfum í Bergs Timber hafa fjölgað úr um þrjú þúsund í um tólf þúsund síðasta árið. Norvik eigi nú um 63,6% hlut í Bergs Timber.
Norvik færir hlut félagsins í Bergs Timber á innra virði þess félags, ekki á markaðsvirði. Innra virðið sé eigið fé deilt með fjölda hlutabréfa í félaginu. Út frá því sé hlutur Norvik í Bergs Timber nú færður inn á um 835 milljónir sænskra króna. Miðað við núverandi gengi íslensku krónunnar væri sá hlutur metinn á 12,5 milljarða íslenskra króna.
Sé hlutur Norvik í Bergs Timber umreiknaður á markaðsverð er útkoman hins vegar sem svarar um 21 milljarði íslenskra króna á núverandi gengi. Með því hefur verðmæti hlutarins hækkað um 8,5 milljarða íslenskra króna frá hinu skráða innra virði bréfanna. Gengið fór lægst í um 1,85 í byrjun apríl í fyrra en var um 6,3 í gær sem er ríflega þreföldun frá upphafi faraldursins. Fjárfestar sem komu inn í félagið þegar hrávörumarkaðir voru veikir vegna tímabundins falls í eftirspurn hafa því ávaxtað pund sitt vel.
Jón Helgi segir það eiga þátt í verðhækkunum á timbri að framboðið hafi ekki haldið í við eftirspurnina.
„Það hefur aldrei sést jafn hátt verð á þessum markaði en um er að ræða framvirka samninga. Það segir manni að menn búast við að verðið muni haldast svona hátt og jafnvel hækka. Það sem dregur þetta áfram er til dæmis að mörgum sögunarmyllum í Kanada var lokað í byrjun faraldursins og það er ekkert auðvelt að byrja upp á nýtt. Þú ræsir ekki svona myllu einn tveir og þrír,“ segir Jón Helgi um áhrif lokana á framboðið.
Hann segir í samtali við ViðskiptaMoggann að rekstur Norvik hafi heilt yfir gengið vel í faraldrinum.