Fida Abu Libdeh hefur verið endurkjörin formaður Samtaka sprotafyrirtækja á aðalfundi samtakanna sem fór fram í Húsi atvinnulífsins í gær. Þetta kemur fram í fréttatilkynningu frá samtökunum.
Fida er stofnandi og framkvæmdastjóri GeoSilica, sem er fyrirtæki sem framleiðir náttúruleg fæðubótarefni, einkum úr kísil.
Ásamt Fidu voru Alexander Jóhönnuson, stofnandi Ignas, Ellen María Bergsveinsdóttir, framkvæmdastjóri Mink Campers, Guðbjörg Rist, framkvæmdastjóri Atmonia og Róbert Helgason, framkvæmdastjóri KOT, kjörin í stjórn.
Samtök sprotafyrirtækja starfa sem starfsgreinahópur innan Samtaka iðnaðarins. Þau vinna að hagsmunum og stefnumálum sprotafyrirtækja á Íslandi.
Í samtökunum eru yfir 50 fyrirtæki í ólíkri starfsemi og á ólíkum vaxtarstigum. Öll fyrirtækin eiga það þó sameiginlegt að vera með veltu undir milljarði íslenskra króna og verja stórum hluta sinnar veltu í rannsóknir og þróun, að því er segir í tilkynningu.