Nýr bátur í íslenska útgerðarflotann
Setja bókamerki
Útgerðarmaðurinn Pétur Pétursson frá Arnarstapa á Snæfellsnesi skrifaði á íslensku sjávarútvegssýningunni í dag undir nýsmíðasamning við Bredgaard Bateværft í Danmörku. Um er að ræða bát sem á að leysa af hólmi þann fengsæla bát Bárð SH-81.
Nýsmíðin verður umtalsvert stærri en eldri báturinn, og í raun stærsti bátur sem smíðaður hefur verið úr trefjaplasti fyrir íslenskan útgerðarmann. Nýr Bárður SH-81 verður 25,18 metrar á lengd og 7 metra breiður og djúpristan 2,5 metrar.
Smíðin tekur eitt ár
Pétur hefur í samstarfi við hönnuð bátsins Borghegn Yachtdesign hannað alla megin þætti sem lúta að útfærslum ofandekks.
„Bredgaard Badeværft bátasmiðjan er rómuð fyrir smíði á mjög sterkum og vönduðum bátum og hafa þeir smíðað báta úr trefjaplasti síðan 1967. Smíðin á nýjum Bárði hefst innan nokkurra vikna og er áætluð að smíðin taki eitt ár. Smíðin verður undir eftirliti flokkunarfélagsins Bureau Veritas í Danmörku," segir Björn Jóhann Björnsson, framkvæmdastjóri Aflhluta ehf., sem er umboðsaðili Bredgaard Bateværft.
Miklir möguleikar í þessum stærðarflokki
Eigendur Aflhluta eru nú orðnir þrír, þar sem Helgi Axel Svavarsson bættist í eigendahópinn í janúar á þessu ári. Helgi ber titilinn tækni og þjónustustjóri, en fyrir eru þeir Björn framkvæmdastjóri og Hrafn Sigurðsson sölustjóri.
„Við teljum að það séu miklir möguleikar þegar kemur að endurnýjun í þessum stærðarflokki og einnig í bátum í krókaaflskerfinu. Við teljum að þegar útgerðarmenn hafa kynnst bátunum frá Bredgaards og séð hversu sterkbyggðir þeir eru muni áhuginn á bátunum aukast enn frekar. Frágangurinn á bátunum er með þeim hætti sem íslenskir útgerðarmenn með báta í þessum stærðarflokki hafa ekki kynnst áður," segir Hrafn.
Aflhlutir koma til með að skaffa allan vélbúnað í nýjan Bárð SH og má þar nefna aðalvél frá MAN, ljósavélar frá ZENORO með John Deere vélum og Stamford rafölum, gír frá TWIN DISC gír, skrúfubúnað frá Teignbridge og TRAC hliðarskrúfur.
„Það þarf að vinna mikinn fjölda upp“
Skemmtiferðaskip hætt komið nærri Viðey
„Umsátursástand“
„Höfum ekki náð að skríða upp úr þeirri gryfju“
Telur forsendur fyrir vaxtalækkun
Handteknir eftir myndatöku í Vesturbæjarlaug
Krefjast stöðvunar framkvæmda