Reynt að halda verksmiðjunum gangandi

Bjarni Ólafsson AK kom til Neskaupstaðar í morgun með 1.810 tonn af kolmunna sem hann fékk í fjórum holum í færeysku lögsögunni. Vilhelm Þorsteinsson EA landaði þá 2.100 tonnum á Seyðisfirði í gær.

Gunnar Sverrisson verksmiðjustjóri Síldarvinnslunnar á Seyðisfirði segir að lögð hafi verið áhersla á að halda verksmiðjunum á Seyðisfirði og í Neskaupstað gangandi að undanförnu þegar kolmunnaveiðin var heldur treg, að því er fram kemur á vef útgerðarinnar.

Til dæmis hafi Börkur NK landað síðasta farmi sínum bæði í Neskaupstað og á Seyðisfirði á mánudag og þriðjudag, svo unnt væri að halda verksmiðjunum gangandi. Landaði skipið 1.200 tonnum í Neskaupstað og 1.000 tonnum á Seyðisfirði. Upplýsir Gunnar að verksmiðjan á Seyðisfirði sé búin að taka á móti 41.000 tonnum af kolmunna frá því í marsmánuði.

Hafþór Eiríksson verksmiðjustjóri í Neskaupstað segir að Beitir NK hafi landað þar 2.400 tonnum í fyrradag og þá sé búið að taka á móti 48.000 tonnum af kolmunna á árinu þannig að verksmiðjur Síldarvinnslunnar á Seyðisfirði og í Neskaupstað hafa samtals tekið á móti 89.000 tonnum.

• Blogga um frétt