Landaði 67 tonnum með nýjan poka

„Þetta var ágætur afli sem fékkst í Litladýpi suðaustur úr Hvalbaknum. Veiðiferðin var stutt vegna þess að fiskvinnslustöðinni vantaði hráefni,“ segir Þórhallur Jónsson, skipstjóri á ísfisktogaranum Gullveri NS, sem landaði 67 tonna afla á Seyðisfirði í gær.

Uppistaða aflans var þorskur en auk þess var skipið með karfa og ýsu, eftir veiðiferð sem hófst á mánudag.

Gullver hélt svo til veiða á ný í gærkvöldi, en skipið er nýlega farið að nota nýja gerð af trollpoka sem þróaður hefur verið hjá Fjarðaneti. Pokinn er fjögurra byrða skálmapoki þannig að aflinn sem í hann kemur skiptist í tvennt og þannig er minni pressa á fiskinum. Þarna er um að ræða síðupoka sem felldur er á nýstárlegan hátt.

Á vef Síldarvinnslunnar er haft eftir Hermanni Hrafni Guðmundssyni hjá Fjarðaneti á Akureyri að byrjað hafi verið að nota þennan poka í vetur. Nú hafi hann verið reyndur á þremur togurum.

„Þessi poki er unik að allri gerð og reynslan af honum hefur verið afar góð. Ekki veit ég hvað á að kalla þennan poka, en ætli sé ekki best að kalla hann bara unik–poka,“ segir Hermann.

• Blogga um frétt