Tvær lagnir í hverjum róðri

„Við róum stíft og helst má ekki detta dagur út. Gjarnan er farið út klukkan tvö á nóttinni og komið í land undir kvöld svo þetta er heilmikið púl,” segir Guðmundur Þór Jónsson, skipstjóri á Einari Guðnasyni ÍS 303 frá Suðureyri.  Báturinn er 22ja tonna og hét áður Indriði Kristins BA og var gerður út frá Tálknafirði. Það var svo í sumar sem Norðureyri ehf. eignaðist bátinn, en aflinn er lagður upp í vinnslustöð Íslandssögu á Suðureyri.

Frá Suðureyri er stutt á góð og gjöful mið. Á Einari Guðnasyni ÍS eru menn aðallega að sækjast eftir þorski en fá þó líka talsvert af ýsu. Beitningarvél er í bátnum sem gerir kleift að setja út tvær lagnir í hverjum róðri og vera lengur á sjó sem því nemur.

„Ef við ætlum að setja út tvær lagnir tökum við tvöfaldan beituskammt, en í hverri lögn eru 17.000 krókar. Það felst auðvitað talsvert hagræði í að lagnirnar séu tvær. Eftir slíka túra höfum við að undanförnu stundum komið með um 12 tonn að landi sem er mjög gott.“

Stöðugur með veltitönkum

 Sex karlar eru í áhöfninni á Einari Guðnasyni ÍS; það er fjórir á sjó og tveir í fríi. Skipstjóri á móti Guðmundi er Höskuldur Ástmundsson. „Við tókum við bátnum um mitt sumar og byrjuðum að róa í ágúst og þá  var ágætt fiskirí. Lentum í bilunum í upphafi, það tók tíma að venjast bátnum og áhöfnin þurfti að slípast saman. Núna er þetta hins vegar orðið fínt. Báturinn, sem er með veltitönkum, er líka mjög stöðugur og fer vel með mannskap,“ segir Guðmundur Þór sem er Skagamaður að uppruna, en flutti vestur á Suðureyri á síðastliðnu ári.

Einar Guðnason ÍS hét áður Indriði Kristins og varð gerður út frá Tálknafirði. mbl.is/Sigurður Bogi

Fyllt í körin á bryggjunni á Suðureyri. mbl.is/Sigurður Bogi

• Blogga um frétt