„Ég vísa þessu aftur til föðurhúsanna“
Setja bókamerki
„Ég vísa þessu aftur til föðurhúsanna. Ég get ekki séð hvernig félagsmaður sem gerir athugasemd við ósamræmi við lögum félagsins á heimasíðu og í fundargerðum geti eyðilagt slíka sameiningu,“ segir Heiðveig María Einarsdóttir, en henni var vikið úr Sjómannafélagi Íslands í gær. Jónas Garðarsson, formaður félagsins, sagði í samtali við mbl.is í dag að Heiðveig hefði unnið alvarlega gegn hagsmunum félagsins á sama tíma og sameining félagsins við fjögur önnur stóð fyrir dyrum. Það að upp úr viðræðunum hafi slitnað sé runnið undan hennar rifjum. Heiðveig segir fráleitt að halda þessu fram.
Heiðveig hafði tilkynnt um framboð í komandi formannskosningum Sjómannafélagsins en skömmu eftir að hún tilkynnti það var lögum félagsins breytt á heimasíðunni og þar kveðið á um að þeir einir væru kjörgengir sem hefðu greitt félagsgjöld síðastliðin þrjú ár. Það hefði útilokað framboð Heiðveigar enda skammt síðan hún tók upp sjómennsku á nýjan leik.
Ítrekað reynt að fá fund með lögmanni félagsins
Hún hefur harðlega gagnrýnt vinnubrögð stjórnarinnar síðustu vikur og ítrekað reynt að fá fund með lögmanni félagsins, sem og stjórnarmönnum, til að komast að því hvaða lög eru í gildi í félaginu. „Því hefur ekki verið svarað nema með útúrsnúningum. Ég hef verið í tölvupóstsamskiptum við lögmann félagsins sem hefur ekki geta staðfest þetta eða bókað fund.“
Formaður félagsins sagði í samtali við mbl.is í dag lögin í hafa verið í gildi frá því á aðalfundi í desember 2017, þó þau hafi ekki verið uppfærð á heimasíðunni fyrr en nýlega. Viðræðum um sameiningu sjómannafélaganna fimm var slitið fyrr í þessum mánuði, skömmu eftir að Heiðveig kom fram með athugasemdir um ósamræmi í lögunum.
Heiðveig segir formann félagsins ekki hafa geta hrakið efnislega ásakanir hennar á hendur honum og stjórninni. „Það að hann haldi því fram að ég hafi eyðilagt þessa sameiningu, með því sem félagsmaður að óska eftir gögnum, og benda svo á ósamræmi í lögum félagsins, er eins fráleitt og það getur verið að mínu mati.“
Fólk komið „með upp í kok á ólýðræðislegum tilburðum“
Heiðveig hyggst leitar réttar síns vegna brottvikningarinnar og segir málið hafa verið í skoðun í allan dag. Það heyri líklega undir félagsdóm. „Ég vona félagsmenn standi vörð um félagið sitt meðan á þessu stendur, að það verði kosið um framboðslista í lýðræðislegri kosningu og það verði það fólk sem komi til með að stýra félaginu áfram til betri og breyttari tíma. Ég vona að það komi út úr þessu.“
Viðbrögðin í dag hafa heldur ekki látið á sér standa. „Ég hef fengið ótrúleg viðbrögð úr öllum áttum. Úr öllum félögum og stéttum sjómanna og að sjálfsögðu mínu félagi. Það virðist vera að fólk sé komið með upp í kok á svona ólýðræðislegum tilburðum. Fólk deilir því með mér að vera hreinlega orðlaust, enda er þetta algjörlega fordæmalaust að svona fundur geti með þessum hætti, án þess að gefa rök og án andmælaréttar, tekið svona ákvörðun,“ segir Heiðveig, en hún var rekin úr félaginu á grundvelli samþykktar trúnaðarmannaráðs vegna kröfu fjögurra fulltrúa ráðsins. „Það virðist vera einhver ótti við að fara í lýðræðislegar kosningar, þó félagið eigi að standa fyrir það. Ég veit ekki hver skýringin á þessu er.“
Heiðveig segist hafa skoðað lögin áður en hún tók ákvörðun um framboð til formanns og þá hafi umrætt ákvæði um kjörgengi ekki verið til staðar. Eftir að hún tilkynnti framboðið hafi hún hins vegar tekið eftir því að lögunum hafði verið breytt á heimasíðunni og þessu ákvæði bætti inn, sem og sjö öðrum. Afrit sem vefsafn Landsbókasafn tók í maí á þessu ári staðfestir að ákvæðið var ekki til staðar þá.
„Þá óskaði ég eftir því að sjá fundargerðarbækur á skrifstofu félagsins, sem ég fékk ekki á þeim tímapunkti, heldur voru mér sendar af þeim ljósmyndir. Miðað við þær myndir þá er einungis ein af þessum átta breytingum heimasíðunni sem á sér stoð í þessari fundargerð og það er þessi þriggja ára grein. Ég setti spurningarmerki við gildi lagabreytinganna þar sem þeirra var ekki getið í fundarboði og ritari stjórnar ritar ekki undir fundargerð eins og honum ber að gera lögum samkvæmt, heldur einungis formaðurinn sjálfur. Og líka af því hve erfitt var að fá fundargerðina.“
Eftiráskýringar ekki gildar
Heiðveig segir allar eftiráskýringar um að heimasíðan hafi verið illa uppfærð ekki gildar þar sem lagabreytingarnar eigi ekki sér ekki stoð í fundargerðinni. „Ég skil ekki, fyrst ég er að valda félaginu svona miklum skaða, af hverju þetta er ekki hrakið. Ég hefði aldrei sett þessar athugasemdir fram nema þær ættu við rök að styðjast, enda ætlaði ég bara að bjóða mig fram og leyfa félagsmönnum að kjósa um það, hvort þeir fylgdu mér í hugmyndum um breytingar. Þegar maður veit ekki hvort maður er kjörgengur þá er mjög erfitt að halda áfram að kynna framboðið. Það er því rökrétt skref að kanna hvernig lögin eru. Ég brenn fyrir þessu málefni og hef gert í langan tíma.“
Hún segist þó alltaf hafa gert ráð fyrir því að framboð hennar væri löglegt og óskaði eftir því með bréfi til starfsmanna félagsins og trúnaðarmannaráðs í síðustu viku að kjörgengi hennar yrði staðfest. „Þetta brottrekstrarbréf var kannski bara svar við því.“
Þyngri refsing fyrir að nauðga stjúpdóttur æskuvinar
Hvorki sést áður hér á landi né annars staðar
Væri að ljúga ef ég segðist ekki stressaður
Frambjóðendur skila inn listum í Hörpu
Telur forsendur fyrir vaxtalækkun
Mál hjúkrunarfræðingsins fer aftur fyrir héraðsdóm
Bergnuminn í Hvalfirði