Milljón þörungar í hverjum lítra af sjó

„Þetta eru kalkþörungar sem eiga uppruna sinn á 60. gráðu norðurbreiddar, blómstra og berast síðan hingað norður eftir með straumum. Það er svo háð veðri og vindum hve mikið og hve lengi þeir sjást,“ segir Hafsteinn Grétar Guðfinnsson, sjávarlíffræðingur hjá Hafrannsóknastofnun, um fagran þörungablóma sem borist hefur vestur fyrir Ísland.

Frétt af mbl.is

Þörungar blómstra fyrir vestan land

Eldfjallafræði- og náttúruvárhópur Háskóla Íslands vakti athygli á þörungunum sem sjást afar vel á ljósmynd úr TERRA-gervitungli NASA.

„Ef sjórinn er úfinn þá blandast þetta og hverfur sjónum,“ segir Hafsteinn og kveður sýnileika þörunganna bera í raun vitni um gott tíðarfar.

Hafa borist norður fyrir land í góðri tíð

„Það eru þó nokkur ár sem myndast hafa mjög stórir flekkir og þeir borist hingað að Suður- og Vesturlandi, og jafnvel norður fyrir land. Það eru til dæmi um það, en þá hefur tíðin verið svona góð. Við höfum séð þennan allan júní fyrir sunnan land og fyrir sunnan Reykjanes og í síðustu viku hefur hann borist inn í Faxaflóa.“

Kalkþörungarnir eru afar litlir, eða aðeins 5 til 8 míkrómetrar með skelinni. „Skeljarnar endurnýjast og þær losna þegar nýjar myndast og það eru í rauninni þær sem endurkasta sólarljósinu og valda þessum lit. Þegar liturinn er eins og þarna er, þá eru skeljarnar orðnar í tugum milljóna í einum lítra af sjó og frumurnar í milljónum,“ útskýrir Hafsteinn.

• Blogga um frétt