Bráðveikur sjómaður fluttur með þyrlu og flugvél

Beiðni um aðstoð vegna bráðveiks skipverja á línuskipi sem statt var um 15 sjómílur út af Langanesi barst Landhelgisgæslunni um hádegisbil í dag. TF-GRO var umsvifalaust send af stað sem og liðsmenn björgunarsveitarinnar Vopna á Vopnafirði sem héldu til móts við skipið á björgunarskipinu Sveinbirni Sveinssyni.

Þá var sjúkraflugvél kölluð út og beðin að halda á Þórshöfn. Þetta kemur fram í tilkynningu frá Landhelgisgæslu Íslands.

Frétt af mbl.is

Sjómaðurinn fluttur með sjúkraflugi

Klukkan 14:47 var þyrla Landhelgisgæslunnar komin að skipinu. Sigmaður og læknir fóru um borð og í kjölfarið var sjúklingurinn hífður upp í þyrluna af stafni skipsins.

Þyrlan flaug rakleiðis á Þórshöfn þar sem sjúkraflugvél Mýflugs beið og flaug með sjúklinginn til Reykjavíkur.

Þegar þyrlan var á heimleið óskaði lögreglan á Suðurlandi eftir aðstoð áhafnar þyrlunnar vegna göngumanns sem hafði örmagnast í grennd við Morinsheiði. Þegar þyrlan var skammt frá göngumanninum var útkallið afturkallað þar sem björgunarsveitamenn voru komnir að manninum og fylgdu honum niður í Bása.

Frétt af mbl.is

Þyrla á leið að sækja veikan sjómann

• Blogga um frétt