West Seafood gjaldþrota

West Seafood ehf. á Flateyri hefur verið úrskurðað gjaldþrota. Bæjarins besta greindi frá því fyrir helgi en fram kemur í tilkynningu frá Frjálsa lífeyrissjóðnum að fyrirtækið hafi verið úrskurðað gjaldþrota á fimmtudag og fyrrverandi starfsmönnum ráðlagt að gæta að réttindum sínum.

Greint var frá því í kvöldfréttum RÚV að yfir 30 manns ættu kröfur á fyrirtækið allt að 18 mánuði aftur í tímann. Haft er eftir Finnboga Sveinbjörnssyni, formanni Verkalýðsfélags Vestfirðinga, að skuld fyrirtækisins við 32 félagsmenn sé á bilinu tíu til fjórtán milljónir. 

West Seafood var stofnað í mars 2015 en hét þá Fiskvinnsla Flateyrar. Ýmislegt hefur gengið á í starfsemi fyrirtækisins. Í febrúar lagði Vinnueftirlitið til að mynda bann við vinnu við roðflettivél og hausara hjá fyrirtækinu eftir eftirlitsheimsókn á staðinn. Í ljós kom að ör­ygg­is­rofi fyr­ir grind yfir færi­band fram­an á roðfletti­vél virkaði ekki og var lífi og heil­brigði starfs­manna tal­in veru­leg hætta búin. Úrbætur voru gerðar og vinna var leyfð fljótlega að nýju. 

Frétt af mbl.is

Lífi og heilbrigði starfsmanna talin hætta búin

Eignir West Seafood felast einkum í fasteignum, fiskvöru, vinnsluvélum og einu skipi, samkvæmt upplýsingum frá skiptastjóra. Frestur til að lýsa kröfum rennur út í nóvember.

• Blogga um frétt