Skoða þurfi lagaumhverfi fiskmarkaða

Enn á eftir að afla frekari upplýsinga í þeim tilgangi að kortleggja hvað veldur því að fiskur er í auknum mæli fluttur óunninn úr landi og hvort eitthvað sé hægt að gera til að sporna við því, segir Lilja Rafney Magnúsdóttir, formaður atvinnuveganefndar Alþingis.

Lilja Rafney segir eitt af því sem þurfi að skoða vera lagaumhverfi fiskmarkaða. „Þar virðist vera að fara í gegn hráefni sem ekki virðist þurfa að bjóða öðrum til sölu innanlands. [...] Sum viðskipti hjá þeim við aðila sem eru að selja út óunnið hráefni fara ekki í gegnum svokallaða klukku – það þýðir að það stendur ekki öðrum til boða. Þeir sjá bara um fjárhagshliðina á þessum viðskiptum,“ útskýrir hún.

Frétt af mbl.is

Tókust á um útflutning á óunnum fiski

Skiptar skoðanir komu fram á fundi atvinnuveganefndar í gærmorgun, en á honum var rætt um samkeppnisstöðu innlendrar fiskvinnslu gagnvart ríkisstyrktri fiskvinnslu innan Evrópusambandsins.