„Þegar við lendum í þessum vandræðum að geta ekki leigt kvóta en höfum stólað á það getur það leitt til þess að hver útgerðin á fætur annarri einfaldlega stöðvast á þessu fiskveiðiári, þar sem menn hafa ekki ýsukvóta og geta ekki farið á sjó og náð eingöngu þorski,“ segir Örn Pálsson, framkvæmdastjóri Landssambands smábátaeigenda. Hann segir fiskveiðiárið verða erfitt fyrir útgerðir í krókaaflamarkskerfinu þar sem veiðiheimildir í ýsu eru fimmtungi minni í kerfinu en síðasta fiskveiðiár.

Frétt af mbl.is

Lækka aflamark ýsu um 28%

„Þorskveiðikvótinn var aukinn og eru um 4% meiri heimildir í þorski. Þegar línuveiðar eru stundaðar er mjög blandað þorskur og ýsa. Þá er alveg ljóst að það þarf að forðast dálítið ýsuna núna og miðað við ráðgjöf Hafrannsóknastofnunar mátti gera ráð fyrir minni ýsu, en það hefur komið mun meiri ýsa en undanfarin ár. Þess vegna hefur bátunum gengið verr að vera nánast eingöngu í þorski og það gengur mjög hratt á veiðiheimildirnar í ýsu hjá þeim. Núna á fyrsta fjórðungi [fiskveiðiársins] voru þeir búnir að veiða um 54% af veiðiheimildunum. Þessi tala í fyrra var 43%,“ útskýrir Örn.

Breyttar aðstæður

„Það sem gerir þetta enn erfiðara er að það er engan ýsukvóta að fá. Hann var skorinn niður um fjórðung hjá öllum og stærri skipin eru lítt aflögufær með ýsu. Þess vegna geta krókaaflamarksbátarnir ekki stólað á það að geta leigt ýsukvóta eins og undanfarin ár til sín,“ bætir hann við. Þá hefur skortur á veiðiheimildum einnig haft þær afleiðingar að leiguverð hefur hækkað til muna.

Spurður hvort þetta geti orðið til þess að bátar verði í fastir í höfn þar sem þeir geta ekki treyst því að veiða eingöngu þorsk, svarar framkvæmdastjórinn því játandi. Hann segir rekstraraðila grípa til allra ráða til þess að leysa þá stöðu sem upp er komin, en leit að svæðum með minni þorsk er lílega til þess fallin að auka rekstrarkostnað og gefa af sér afurð sem fæst minna fyrir.

Frétt af mbl.is

Ekki fyrirhugað að breyta aflareglu í ýsu

Tengdar fréttir

Smábátaveiðar

Ánægður með nýja Sigrúnu Björk ÞH

• Lokun Skápsins tvímælalaust að skila sér
• „Leggjum línuna hvenær sem veður leyfir“
• Náðu 10 tonnum í mokveiði
• Fordæma vinnubrögð og mótmæla tillögum

» Fleiri tengdar fréttir