Ekki fyrirhugað að breyta aflareglu í ýsu

Sjávarútvegsráðherra mun ekki leggja til að aflareglu fyrir ýsu verði breytt eða hún afnumin á fiskveiðiárinu 2019/2020. Þar af leiðandi kemur ekki til að Hafrannsóknastofnun endurskoði stofnmat sitt og útreikninga um aflamark samkvæmt aflareglu sem kynnt var í júní.

Þetta kemur m.a. fram í svari Kristjáns Þórs Júlíussonar við fyrirspurn frá Sigurði Páli Jónssyni, Miðflokki, á Alþingi.

Í fyrirspurninni segir að aflahlutdeild í ýsu hafi verið skert um 30% fyrir fiskveiðiárið 2019–2020. Það hafi leitt til þess að útgerðar- og sjómenn hafi litlar veiðiheimildir og illa gangi að fá ýsu leigða. Í svarinu kemur fram að aflaregla ýsu hafi verið endurskoðuð síðastliðinn vetur og veiðihlutfall lækkað úr 0,4 í 0.35. Ráðherra hafi til þessa leitast við að fylgja ráðgjöf Hafró sem byggist á vísindalegum grunni.