Ráðgjöf Hafrannsóknastofnunar um aflamark fyrir fiskveiðiárið 2020/2021 er heldur lægri í flestum tegundum miðað við yfirstandandi fiskveiðiár, að því er fram kom á kynningarfundi stofnunarinnar í húsakynnum þess í morgun.

Þá hefur ráðgjöf í þorski verið lækkuð úr 272.411 tonnum á yfirstandandi ári í 255.593 tonn fyrir næsta fiskveiðiár, sem er um 6% lækkun. Gert er ráð fyrir að viðmiðunarstofn þorsks verði svipaður 2021 og hann er nú og að hann verði svipaður á næstu árum.

Fram kom að vanti stóra árganga í þorskinn og þrátt fyrir að sóknin hafi minnkað hafi meðalaldur þorska hækkað. Jafnframt hafi verið minna af loðnu í smáþorski en áður, en meiri af ljósátu. Og er talið áhyggjuefni að minna sé af fæðu nú en undanfarin ár.

Þó nokkrar lækkanir

Þá er ráðlagt að aflamark í ufsa verði 78.574 tonn sem er 2% minna en við fyrri ráðgjöf. En mesta lækkunin var í keilu og nam lækkunin 41% og nemur ráðgjöf 2.289 tonn. Þá varð 12% lækkun í hlýra, 16% í blálöngu, 14% í lögnu og 5% í gulllax.

Auk þess nam lækkun í þykkvalúru, langlúru og sandkola 20%.

Ráðgjöf í ýsu hækkuð um 9%

Ráðlagt aflamark í ýsu er 45.389 tonn sem er um 9% hækkun frá yfirstandandi fiskveiðiári en aflamark í ýsu var lækkað um 25% eftir síðustu ráðgjöf. Einnig hækkar ráðgjöf í síld um 3% og nemur ráðlagt aflamark 35.490 tonnum. Auk þess hækkar ráðgjöf Hafrannsóknastofnunar í grálúðu eða 10% og nemur ráðgjöf 23.530 tonnum.

Ráðgjöf fyrir steinbít nemur 8.761 tonn og er hækkun um 5% frá fyrri ráðgjöf.

Tengdar fréttir

Hafrannsóknastofnun

Hafa kortlagt um sex þúsund ferkílómetra

• Vísar gagnrýni á togararall á bug
• Telur stærð nytjastofna stórlega vanmetna
• „Allir um borð eru afskaplega hjálplegir“
• Samstarfssamningur Hafró og NMSÍ undirritaður

» Fleiri tengdar fréttir

• Blogga um frétt