Stofna klasa af íslenskri fyrirmynd í Færeyjum

Fimmti sjávarklasinn utan Íslands hefur verið stofnaður í Færeyjum og hefur sá færeyski gert samning um samstarf við þann íslenska, að því er fram kemur í tilkynningu á vef Íslenska sjávarklasans.

Þá segir að „Íslenski sjávarklasinn mun liðsinna Færeyska sjávarklasanum við uppbyggingu á fyrstu misserum færeyska klasans með því meðal annars að kynna hvernig klasastarfsemin hefur farið fram hérlendis og áherslur Íslenska sjávarklasans á fullvinnslu afurða, eflingu sprotafyrirtækja og nýsköpunar.“

Frétt af mbl.is

Námsferðir til Arnarfjarðar urðu að sjávarklasa

Eins og fyrr segir er sá færeyski sá fimmti í röðinni af erlendum sjávarklösum og hefur áður verið stofnaðir sjávarklasar í Maine-, Alaska, Washington- og Massachusettsríkjum í Bandaríkjunum. Áhugi er einnig innan fleiri bandaríkja þar vestra að stofna klasa að íslenskri fyrirmynd auk þess sem slíkan áhugi er að finna í öðrum heimshlutum, að því er fram kemur í tilkynningunni.

Þá séu sjávarklasarnir tengdir hvort öðrum og getur færeyski  klasinn „nýtt sér þetta tengslanet klasa og liðsinnt jafnframt þannig færeyskum fyrirtækjum sem hyggjast efla útrás.“

„Við erum hæstánægð með að skrifa undir þennan samstarfssamning við Íslenska sjávarklasann. Við höfum fylgst með árangursríkri uppbyggingu hans um langt skeið og við trúum því að í samstarfi við hann og aðra sjávarklasa geti orðið til mikil verðmæti,“ er haft eftir Unni Laksá, framkvæmdastjóra Sjókovans í Færeyjum.

Frétt af mbl.is

Útrás til Seattle fer vel af stað

• Blogga um frétt