Beitir NK, Börkur NK og Vilhelm Þorsteinsson EA héldu til makrílleitar í nótt. Fátt er hins vegar að frétta af leitinni eins og stendur, segir Tómas Kárason, skipstjóri á Beiti, í færslu á vef Síldarvinnslunnar.

„Við byrjuðum að fara út fyrir kantinn við Litladýpi og erum nú að fylgja hitaskilum suður eftir. Hér er dálítið síldarlíf en annars ósköp lítið að sjá. Börkur byrjaði leit út við Berufjarðarálshorn og Vilhelm á Papgrunni en er nú að leita í Rósagarðinum. Hoffell er síðan að leita dálítið norðar. Ísleifur mun hafa kastað suður af landinu í gær með litlum árangri og Grandaskipin, Venus og Víkingur, eru að koma að vestan. Fleiri eiga síðan eftir að bætast í hópinn,“ segir Tómas.

Hann telur líklegt að leita þurfi mun sunnar til að finna makríl þar sem sjórinn er heldur kaldari nú en á sama tíma í fyrra, það vori seint. „Í fyrra byrjuðum við að veiða á eftir sumum öðrum skipum vegna þess að við vorum í slipp. Þá köstuðum við fyrst 9. júlí á Þórsbankanum og þá var þar töluvert að sjá, bæði síld og makríl. Það hefur sem sagt enginn rekist á neitt sem orð er á gerandi hingað til en færeysku makrílskipin virðast vera að veiðum norður af Færeyjum. Ég hef trú á því að hitastigið í sjónum geri það að verkum að makríllinn komi hingað tiltölulega seint en ég held að hann skili sér.“

Tengdar fréttir

Makrílveiðar

Útbreiðsla makríls í íslenskri landhelgi ein sú minnsta

• „Veiðiárangur er oft spurning um heppni“
• „Þetta gengur mjög rólega og lítið um makríl“
• Fyrsti makríllinn úr íslenskri lögsögu
• Tæplega fimm kíló af makríl fyrir eitt af þorski

» Fleiri tengdar fréttir

• Blogga um frétt