Fátt var að frétta af makrílleitinni er blaðamaður ræddi við Berg Einarsson, skipstjóra á uppsjávarskipinu Venusi NS-150, síðdegis í gær. Þá var Venus ásamt Víkingi AK-100 mættur á miðin suður af landinu við Kötluhryggi í leit að makríl, en bæði skipin eru gerð út af Brimi. „Það eru nokkuð mörg skip komin út og eru dreifð að leita. Það hefur enginn híft neitt,“ sagði Bergur.

„Það er verið að leita og athuga hvort við finnum eitthvað. Þetta er fyrsti dagurinn sem við erum að leita núna, en erum búnir að fara tvisvar áður í stutta leit. Sjórinn er nú eitthvað að hlýna en hann er búinn að vera mjög kaldur hérna sunnan við landið,“ útskýrir skipstjórinn sem segir fáar vísbendingar um að makríll fari að sjást.

Ekkert sumar í sjónum

„En þetta hefur aðeins hlýnað og þá er von. Þótt hann [makríllinn] hafi verið eitthvað fyrr á ferðinni í fyrra er ekkert víst að hann verði það núna, enda sjórinn talsvert kaldari í ár. Það er ekkert sumar komið í sjónum. Þetta er bara eins og með landið, það vantar bara sumarið,“ segir Bergur að lokum.

Beitir NK og Börkur NK, skip Síldarvinnslunnar, héldu ásamt uppsjávarskipi Samherja, Vilhelm Þorsteinssyni EA, til leitar austur af landinu aðfaranótt miðvikudags. Hóf Beitir leit við Litladýpi, Börkur við Berufjarðarhálshorn og Vilhelm á Papgrunni. Sagði Tómas Kárason, skipstjóri á Beiti, í gær að makríllinn væri líklega talsvert sunnar og vakti athygli á að færeysku uppsjávarskipin séu á makrílveiðum norður af Færeyjum.

Frétt af mbl.is

Fjöldi skipa leita nú makríls

Tengdar fréttir

Makrílveiðar

Munu reyna til hins ýtrasta að ná samkomulagi

• Samkomulag um ráðgjöf en ekki um veiði
• Leggja til 24% samdrátt í síldarkvóta
• Vilja viðskiptaaðgerðir gegn Noregi og Færeyjum
• „Við höfum ekkert gaman af svartsýni“

» Fleiri tengdar fréttir