Langreyður í Hafnarfjarðarhöfn

Malarflutningaskipið Nordfjod krækti langreyði framan á peru skipsins og sigldi með hana framan á sér á Hvaleyrarbakka í Hafnarfjarðarhöfn í fyrradag. 

Frá þessu er greint á heimasíðu Hafnafjarðarhafnar. 

Þar segir að hafnarstarfsmenn hafi orðið varir við að eitthvað torkennilegt lægi utan á peru skipsins þegar það sigldi inn um hádegisbil í fyrradag. Reyndist það vera langreyður. 

„Í fyrstu var talið að um hrefnu væri að ræða en við nánari skoðun sérfræðinga Hafrannsóknastofnunar, sem sem eru með sínar höfuðstöðvar við hafnarbakkann í Hafnarfirði, kom í ljós að hér var langreyður á ferðinni, um 17 metra langur,“ segir á heimasíðunni.

Dreginn í dag

Rak hvalinn síðan frá malarskipinu, undan austanátt, inn í grjótagarðinn þar sem flotkví liggur. 

„Erfitt var að komast að hvalnum, í bröttum grjótgarðinum, en með aðstoð félaga úr björgunarsveit Hafnarfjarðar tókst um miðjan dag í gær að koma tóg á hvalinn. 

Stefnt er að því að draga hann úr höfninni á  morgunflóðinu í fyrramálið. Þá munu sérfræðingar Hafrannsóknastofnunar taka sýni úr hvalnum og honum síðan sökkt á sínum fyrri heimaslóðum,“ segir í færslu á heimasíðu Hafnafarfjarðarhafnar frá því í gær.

• Blogga um frétt