Fulltrúar Starfsgreinasambands Íslands kynntu sér starfsemi og aðbúnað starfsmanna í nýju frystihúsi Samherja á Dalvík rétt fyrir helgi. „Hérna eru allar aðstæður til mikillar fyrirmyndar,“ er haft eftir Birni Snæbjörnssyni, formanni Starfsgreinasambands Íslands og Einingar-Iðju, á vef Samherja. Skoðaði hann frystihúsið ásamt Flosa Eiríkssyni, framkvæmdastjóra sambandsins.

Vegna kórónuveirufaraldursins hefur verið óheimilt fyrir utanaðkomandi að koma í frystihúsið og var það fyrst nú að hægt var að kynna starfsemina fyrir fulltrúum sambandsins, en flestir starfsmenn vinnslunnar á Dalvík eru í Einingu-Iðju.

Hólmfríður Sigurðardóttir flokksstjóri og Björn. Ljósmynd/Samherji

„Stjórn Einingar-Iðju hafði skoðað húsið áður en vinnsla hófst í fyrra en heimsfaraldurinn hefur komið í veg fyrir heimsókn eins og í dag sem er sannarlega ánægjuleg og langþráð. Öll tæknin hérna inni er mikil og magnað að sjá hversu íslenskt hugvit er áberandi. Maður tekur til dæmis strax eftir hljóðdempun í vinnslusölum, sem er gríðarlega stórt heilsufarsmál. Sömu sögu er að segja um lýsinguna, sem er mjög góð,“ segir Björn.

Frétt af mbl.is

Samherji tekur milljarða fjárfestingu í notkun

Störfin sérhæfðari

„Með aukinni tækni hafa flest störf í fiskvinnslu tekið miklum breytingum, sem eru mjög vel sýnilegar hérna. Störfin eru orðin sérhæfðari og um leið líkamlega léttari. Hérna eru allar aðstæður til mikillar fyrirmyndar. Covid-19 gerði það að verkum að starfsfólkið hefur þurft að starfa við mjög svo krefjandi aðstæður og sem betur fer hefur tekist að halda vinnslunni gangandi. Það var gott að tækifæri gafst í dag til að spjalla við starfsfólkið og kynna sér alla tæknina og aðbúnaðinn í húsinu,“ er haft eftir Birni.

Þorsteinn Már Baldvinsson, forstjóri Samherja, tók á móti Birni og Flosa, en Gestur Geirsson, framkvæmdastjóri landvinnslu Samherja, og Sigurður Jörgen Óskarsson, yfirverkstjóri á Dalvík, leiddu þá um húsið.

Björn og Flosi ásamt Gesti og Sigurði Jörgen. Ljósmynd/Samherji

Tengdar fréttir

Samherji

Mikilvægt að treysta viðskiptasamböndin

• Söfnuðu mottum og hálfri milljón
• Fengu allir sokka í tilefni mottumars
• Kaldbakur fékk yfirhalningu á Akureyri
• SKE rannsakar Samherja og Síldarvinnsluna

» Fleiri tengdar fréttir

• Blogga um frétt