83 grásleppubátar hafa lokið veiðum
Setja bókamerki
Einn og hálfur mánuður er liðinn af gráslepputímabilinu, að einu veiðisvæði undanskildu, og hefur á þessum tíma tekist að landa rúmlega 2.618 tonnum samkvæmt tölum Fiskistofu. Ráðlagður hámarksafli veiðanna er 6.972 tonn og hafa grásleppubátarnir náð 37,5% af þeim afla.
Á Faxaflóa, Vestfjörðum, Húnaflóa, Norðurlandi, Austurlandi og Suðurlandi er veiðitímabilið í ár frá og með 20. mars til og með 30. júní. Gert er ráð fyrir að veiðar verði stöðvaðar á þessum svæðum ef afli fer yfir 78% af ráðlögðum hámarksafla og er það í verkahring Fiskistofu að fylgjast með veiðum og grípa til viðeigandi aðgerða. Alls eru 22% af aflanum ætluð Breiðafirði en þar hefst veiðitímabilið ekki fyrr en 20. maí og stendur til og með 12. ágúst.
Fjórðungi fleiri á rúmri viku
Mun betra verð hefur fengist á vertíðinni en búist var við, bæði á mörkuðum og hjá stærri kaupendum. Fréttir af hagstæðu verði virðast hafa hvatt margan grásleppusjómanninn af stað og hefur aðsókn í veiðarnar aukist nokkuð en í byrjun síðustu viku höfðu 105 bátar landað grásleppu, en þeim hefur fjölgað um tæpan fjórðung og var þetta orðinn 131 bátur 3. maí. Veður hefur einnig þótt henta vel til veiða og var meðafli á bát fyrir tíu dögum 14,8 tonn en var 3. maí orðinn rétt tæp 20 tonn þrátt fyrir töluverða fjölgun báta.
Töluverður fjöldi báta, eða 83, hefur lokið veiðum en veiðidögum var fækkað í 25 úr 35 á grásleppuvertíðinni í fyrra. 61 bátur var 3. maí með virk leyfi og er það nokkur fjölgun frá byrjun síðustu viku þegar þeir voru 53.
Enginn bátur hefur enn náð 50 tonnum enn sem komið er, en aflamesti báturinn það sem af er grásleppuvertíð er Hlökk ST-66 með 48,7 tonn. Næst á eftir er Norðurljós NS-40 með 46,5 tonn og síðan Elín ÞH-82 með 44,4 tonn.
Töluvert hefur verið fjallað um brottkast á vertíðinni en ekki er ljóst hver niðurstaða þeirra mála verður, en fjöldi grásleppusjómanna hefur dregið í efa lögmæti drónaeftirlits Fiskistofu.
Handteknir eftir myndatöku í Vesturbæjarlaug
Banna mengandi búnað sem leyfður er á Íslandi
Skiptir miklu meira máli en fólk grunar
Vélsleðaslys: Þyrlan kölluð út á mesta forgangi
Hvorki sést áður hér á landi né annars staðar
Gígbarmurinn hækkað frá því í gær
Væri að ljúga ef ég segðist ekki stressaður