Sergei Lavrov, utanríkisráðherra Rússlands, hefur verið fluttur á sjúkrahús á Balí í Indónesíu en þar er hann staddur vegna alþjóðlegrar ráðstefnu G-20-ríkja.

Tveir af þremur heimildarmönnum AP-fréttastofunnar sögðu að hann hefði verið fluttur á sjúkrahús vegna hjartavandamála.

Heimildarmennirnir, sem meðal annars koma úr indónesísku stjórnsýslunni, sögðu að Lavrov hefði verið fluttur á Sanglah-sjúkrahúsið í héraðshöfuðborginni Denpasar.

Lavrov er hæst setti rússneski embættismaðurinn sem ætlaði að taka þátt í ráðstefnunni, sem hefst á morgun. 

Xi Jinping og Joe Biden takast í hendur á Balí. AFP/Saul Loeb

G20-ráðstefnan er haldin á sama tíma og matar- og olíuverð hefur hækkað víða um heim vegna stríðsins í Úkraínu. Stríðið er þó ekki á opinberri dagskrá ráðstefnunnar.

Á meðal fleiri gesta verða Joe Biden Bandaríkjaforseti og Xi Jinping, forseti Kína. Þar hittast þeir í fyrsta sinn augliti til auglitis síðan Biden tók við embætti. 

Rússar vísa fregnunum á bug

Utanríksráðuneyti Rússlands hefur vísað á bug frétt AP um að Lavrov hafi verið fluttur á sjúkrahús og segir að um falsfrétt sé að ræða, að því er Reuters greinir frá. 

„Þetta er, að sjálfsögðu, hápunktur falsfrétta,“ sagði María Zakharova, talskona ráðuneytisins.

Uppfært kl. 9.54:

Indónesísk yfirvöld segja að Lavrov hafi verið fluttur á sjúkrahús „í skoðun“ en hann hafi verið „útskrifaður fljótt“, að því er Sky News greinir frá.