Matvælaráðuneytið hefur ákveðið að framlengja frest til að senda inn umsgnir eða ábendingar um frumvarp Svandísar Svavarsdóttir matvælaráðherra um lagareldi til 10. janúar, að því er fram kemur í tilkynningu á vef stjórnarráðsins. Upphaflega var gert ráð fyrir að frestur rynni út 3. janúar.

Síðastliðinn þriðjudag birtu Samtök fyrirtækja í sjávarútvegi (SFS) yfirlýsingu þar sem lýst var alvarlegum athugasemdum samtakanna við frumvarpið þar sem sérstakelga var vakin athygli á að aðeins nokkrar vikur yfir hátíðirnar voru gefnar til að rýna í 124 blaðsíðna frumvarp ráðherrans.

Frétt af mbl.is

Alvarlegar athugasemdir við frumvarp Svandísar

Í tilkynningu ráðuneytisins er vakin athygli á að í frumvarpinu eru lögð til ný heildarlög um sjókvíaeldi, landeldi og hafeldi.

„Markmið frumvarpsins er að skapa lagareldi á Íslandi skilyrði til aukinnar verðmætasköpunar með sjálfbæra nýtingu og vistkerfisnálgun að leiðarljósi. Einnig er lögð áhersla á að lagareldi verði stjórnað út frá skilgreindum mælikvörðum sem komi í veg fyrir að greinin hafi neikvæð áhrif á umhverfi sitt, hvort sem er á vistkerfi eða villta stofna. Að auki verði dýravelferð og sjúkdómavarnir með besta hætti á heimsvísu.“

Frétt af mbl.is

Leggur til friðun Eyjafjarðar og Öxarfjarðar