Franskt skip hefur skynjað merki sem talin eru koma frá flugritum farþegaþotu EgyptAir sem hrapaði í Miðjarðarhafið fyrir um tveimur vikum síðan. Egypsk yfirvöld greindu frá þessu í dag en merkin eiga að koma frá hafsbotni á leitarsvæðinu í Miðjarðarhafinu.
Sextíu og sex voru um borð þegar að þotan, sem var að gerðinni Airbus A320, hrapaði 19. maí. Hún var á leið frá París til Kaíró. Þotan hvarf af ratsjám án þess að senda frá sér neyðarboð.
Frönsk yfirvöld hafa ekki tjáð sig um merkin.