Meira en 1.500 manns var gert að yfirgefa svæði í nágrenni mikilla skógarelda sem nú geisa á Suður-Spáni. Svæðið er þekkt fyrir fjölbreytt lífríki.
Eldarnir kviknuðu í nótt og í morgun höfðu þeir seilst inn í Donana-þjóðgarðinn í Moguer í Andalúsíu.
Verndarsvæðið er á heimsminjaskrá UNESCO og nýtur sérstakrar friðunar vegna líffræðilegs fjölbreytileika. Margir þeirra sem beðnir voru um að yfirgefa svæðið í varúðarskyni voru ferðamenn á tjaldsvæðum.
Á verndarsvæðinu má m.a. finna plöntur og dýr sem eru í útrýmingarhættu.
Tíu þyrlur eru notaðar í baráttunni við eldinn, sjö flugvélar, þar af fjórar sérútbúnar til slökkvistarfs. Vélarnar voru einnig notaðar til að ráða niðurlögum skógarelda í Portúgal en yfir sextíu fórust í þeim hamförum.
Eldsupptök eru ekki ljós.