Þrír stærstu stjórnarandstöðuflokkarnir í Venesúela munu ekki bjóða fram í komandi kosningum í landinu í desember. Ástæðan er sú að kosningarnar munu ekki vera gagnsæjar, að sögn talsmanna flokkanna.
„Það er ekki verjandi að taka þátt,“ sagði Henry Ramos sem er í Lýðræðisflokknum.
Fyrr í þessum mánuði vann flokkur forseta landsins Nicolas Maduro sigur í héraðskosningum í 18 af 23 héruðum landsins. Andstæðingar Maduro hafa bent á að allir hafi ekki setið við sama borð í þeim kosningum.
Mótmæli, ofbeldi á götum úti og verulegur matarskortur ríkir í landinu en stjórnarháttum forsetans hefur verið harðlega mótmælt síðustu misseri.