Demantur sem talið er að sé fimmti stærsti demantur heims fannst nýverið í Afríkuríkinu Lesótó. Demanturinn er metinn á um 40 milljónir bandaríkjadala, sem svarar til tæplega 4,2 milljarða króna.
Námafyrirtækið Gem Diamonds greindi frá fundinum í dag en demanturinn er í d-lit og fannst í Letseng-námu fyrirtækisins í smáríkinu. Ekki kemur fram hvenær hann fannst en í tilkynningu kemur fram að hann sé 910 karöt og af einstökum gæðum. Hlutabréf fyrirtækisins hækkuðu um rúm 14% í verði í kauphöllinni í London í dag eftir að tilkynning var send út um demantinn.